பழனி தண்டாயுதபாணி சுவாமி கோயிலில் கந்தர் சஷ்டித் திருவிழா
பழனி தண்டாயுதபாணி சுவாமி கோயிலில் கந்தர் சஷ்டித் திருவிழா கோலாகலமாகத் தொடங்கியது: உச்சிக்கால பூஜையில் மலைக்கோயில் மூலவருக்கு முதலில் காப்பு கட்டப்பட்டது! சஷ்டி விரதத்தைத் தொடங்கிய பல்லாயிரக்கணக்கான பக்தர்கள்!
அறுபடை வீடுகளில் மூன்றாம் படைவீடான திண்டுக்கல் மாவட்டம் பழனி அருள்மிகு தண்டாயுதபாணி சுவாமி திருக்கோயிலில், நிகழும் பராபவ ஆண்டு ஐப்பசி 24-ஆம் நாளான இன்று (10-11-2026, செவ்வாய்க்கிழமை) கந்தர் சஷ்டித் திருவிழா வெகு விமரிசையாகத் தொடங்கியது.
விழாவின் முதலாம் திருநாளான இன்று பகல் 12 மணியளவில் மலைக்கோயிலில் உச்சிக்கால பூஜை மற்றும் கல்ப பூஜைகள் நடைபெற்றன. பூஜை நிறைவடைந்ததும், சிவாச்சாரியார்கள் வேத மந்திரங்கள் முழங்க மலைக்கோயில் மூலவர் தண்டாயுதபாணி சுவாமிக்கு முதலில் புனிதக் காப்பு கட்டினர்.
அதனைத் தொடர்ந்து, துவார பாலகர்கள், விநாயகர், சண்முகர், வள்ளி-தெய்வானை மற்றும் உற்சவ மூர்த்தியான சின்னக்குமாரசுவாமி ஆகியோருக்குக் காப்பு கட்டப்பட்டுச் சிறப்பு தீபாராதனைகள் நடைபெற்றன.
மூலவர் மற்றும் உற்சவ மூர்த்திகளுக்குக் காப்பு கட்டப்பட்டதைத் தொடர்ந்து, சஷ்டி விரதம் மேற்கொள்ளும் பல்லாயிரக்கணக்கான பக்தர்களுக்கும் கோயில் சிவாச்சாரியார்கள் காப்பு கட்டி விட்டனர்.
இதேபோல், மூன்றாம் படைவீடான அடிவாரம் திருஆவினன்குடி திருக்கோயிலிலும் காப்பு கட்டுதல் வைபவம் சிறப்பாக நடைபெற்று பக்தர்கள் விரதத்தைத் தொடங்கினர்.
தொடர்ந்து இன்று மாலை 5.20 மணிக்குத் தங்கச்சப்பரமும், இரவு 7.15 மணிக்குத் தங்கரதப் புறப்பாடும் நடைபெறவுள்ளன. 7 நாட்கள் நடைபெறும் இத்திருவிழாவின் சிகர நிகழ்வான சூரசம்ஹாரம் வரும் 15-ஆம் தேதி மாலையும், திருக்கல்யாண வைபவம் 16-ஆம் தேதியும் நடைபெறவுள்ளன.
