மக்கள் குறைதீர்க்கும் கூட்டத்தில் காவல்துறையினரின் செயல் நெகிழ்ச்சி
நாகப்பட்டினம் மாவட்ட ஆட்சியர் அலுவலகத்தில் இன்று நடைபெற்ற மக்கள் குறைதீர்க்கும் நாள் கூட்டத்தில், காவல்துறையினரின் மனிதநேயமிக்க செயல் அங்கிருந்த பொதுமக்களிடையே பெரும் நெகிழ்ச்சியையும் பாராட்டையும் பெற்றுள்ளது.
நாகப்பட்டினம் மாவட்டம், திருமருகல் ஒன்றியம், திருப்புகலூர் கிராமத்தைச் சேர்ந்தவர் ஹரி பரந்தாமன். நலிந்த மாற்றுத்திறனாளியான இவர், தனக்கு செயற்கை கால் மற்றும் மூன்று சக்கர வாகனம் வழங்கக் கோரி மனு அளிப்பதற்காக இன்று மாவட்ட ஆட்சியர் அலுவலகத்திற்கு வந்திருந்தார்.
நடக்க இயலாத நிலையில், அவர் ஆட்சியர் அலுவலக வளாகத்தில் தரையில் தவழ்ந்தபடி மனு அளிக்கச் சென்றார். இதைக் கண்ட அங்கு பாதுகாப்புப் பணியில் ஈடுபட்டிருந்த காவல்துறையினர், சற்றும் தாமதிக்காமல் விரைந்து செயல்பட்டனர்.
உடனே ஒரு சக்கர நாற்காலியை எடுத்துக்கொண்டு அவரிடம் ஓடிச் சென்ற போலீசார், ஹரி பரந்தாமனை பத்திரமாக அதில் அமர வைத்தனர்.
மேலும், அவர் மனுவை சமர்ப்பிக்கும் அறை வரை சக்கர நாற்காலியிலேயே அவரைப் பாதுகாப்பாக அழைத்துச் சென்றனர்.
காவல்துறையினரின் இந்த உன்னதமான மற்றும் மனிதநேயமிக்க செயல், குறைதீர்க்கும் கூட்டத்திற்கு வந்திருந்த பொதுமக்கள் மற்றும் சமூக ஆர்வலர்களிடையே பெரும் வரவேற்பையும் நெகிழ்ச்சியையும் ஏற்படுத்தியுள்ளது.
