சிக்கல் செல்லமுத்து மாரியம்மன் கோவில் ஆவணித் திருவிழா
சிக்கல் செல்லமுத்து மாரியம்மன் கோவில் ஆவணித் திருவிழா: பக்திப் பரவசமூட்டிய மாணவிகளின் பரதநாட்டிய நிகழ்ச்சி!
நாகப்பட்டினம் மாவட்டம், சிக்கல் கிராமத்தில் எழுந்தருளியுள்ள அருள்மிகு செல்லமுத்து மாரியம்மன் திருக்கோயிலில் ஆவணித் திருவிழா திருத்தேர் செடில் உற்சவம் விமரிசையாக நடைபெற்று வருகிறது.
விழாவின் 4-ஆம் நாளான இரவு நடைபெற்ற கலை நிகழ்ச்சியில், நாகை வெளிப்பாளையம் ஸ்ரீ சக்தி நாட்டிய வித்யாலயா மாணவிகள் பங்கேற்ற கண்கவர் பரதநாட்டிய நிகழ்ச்சி நடைபெற்றது.
நாட்டியப் பள்ளி இயக்குநர் டாக்டர் A. முத்துலெட்சுமி நெறியாள்கையில் மேடையேறிய இந்நிகழ்ச்சியில், மாணவிகள் தங்களின் நேர்த்தியான அடவுகள், முத்திரைகள் மற்றும் நவரச பாவங்களுடன் கூடிய அபிநயங்களை வெளிப்படுத்தி பார்வையாளர்களை மெய்சிலிர்க்க வைத்தனர்.
விநாயகர் துதி, மாரியம்மன் மற்றும் சிவபெருமானைப் போற்றும் பக்திப் பாடல்களுக்கு மாணவிகள் ஆடிய பக்தி நடனம் கோவில் வளாகத்தில் கூடியிருந்த திரளான பக்தர்களைப் பெரிதும் கவர்ந்தது.
தாள லயத்திற்கும் இசைக்கும் ஏற்ப மாணவிகள் வழங்கிய நடன அசைவுகள் பரதக்கலையின் மேன்மையை பறைசாற்றும் வகையில் அமைந்திருந்தன.
நிகழ்ச்சியின் நிறைவாக, சிறப்பாக நடனமாடி திறமையை வெளிப்படுத்திய மாணவிகளுக்குப் பாராட்டுச் சான்றிதழ்கள் மற்றும் நினைவுப் பரிசுகள் வழங்கி கௌரவிக்கப்பட்டது.
இந்நிகழ்ச்சியில் கிராமப் பொதுமக்கள், திருவிழாக் குழுவினர் மற்றும் திரளான பக்தர்கள் கலந்துகொண்டு மாணவிகளைப் பாராட்டி, அம்மன் தரிசனம் செய்தனர்.
இதற்கான ஏற்பாடுகளை ஸ்ரீ செல்லமுத்து மாரியம்மன் கைங்கர்ய சபா, மருளாளிகள் மற்றும் கிராமவாசிகள் சிறப்பாகச் செய்திருந்தனர்.
