மேகமலை மக்களுக்கு உச்சநீதிமன்ற உத்தரவால் பெரும் நிம்மதி
மேகமலை பகுதி மக்களுக்கு உச்சநீதிமன்ற உத்தரவால் பெரும் நிம்மதி: மாவட்ட ஆட்சியர் மற்றும் தமிழக அரசுக்கு வன விவசாயிகள் நெஞ்சார்ந்த நன்றி.
தேனி மாவட்டம், வருசநாடு மற்றும் மேகமலை உள்காட்டுப் பகுதிகளில் வசிக்கும் மக்களை வெளியேற்றும் முயற்சிக்கு எதிராகத் தொடரப்பட்ட வழக்கில், உச்சநீதிமன்றத்தில் மக்களுக்குச் சாதகமான உத்தரவு பிறப்பிக்கப்பட்டுள்ளது.
இதனால் அப்பகுதி மக்களிடையே நிலவிய நீண்டகால அச்சம் நீங்கி, பெரும் நிம்மதி ஏற்பட்டுள்ளது. இந்தச் சாதகமான தீர்ப்பிற்குக் காரணமாக இருந்த மாவட்ட ஆட்சியருக்கும், தமிழக அரசுக்கும் வன விவசாயிகள் மற்றும் பொதுமக்கள் நேரில் சென்று தங்களது நன்றியைத் தெரிவித்துக் கொண்டனர்.
தேனி மாவட்டத்தில் உள்ள உள்காடுகள் மற்றும் மேகமலைப் பகுதிகளில் வசிக்கும் மக்களைப் பாதுகாப்பது தொடர்பாக ஆரம்பக் காலத்திலிருந்தே பல்வேறு போராட்டங்கள் முன்னெடுக்கப்பட்டு வந்துள்ளன. கடந்த 1971-ஆம் வாக்கில் இடதுசாரி அமைப்புகளின் முன்னெடுப்பால் அப்பகுதி மக்களுக்கு நில உரிமைக்கான பட்டா வழங்கும் முயற்சிகள் மேற்கொள்ளப்பட்டன.
இருப்பினும், முந்தைய காலங்களில் காடுகளை வகைப்படுத்துவதில் ஏற்பட்ட சிக்கல்களாலும், ரிசர்வ் பாரஸ்ட் தொடர்பான நடவடிக்கைகளாலும் அப்பகுதி மக்கள் கடுமையாகப் பாதிக்கப்படும் சூழல் உருவானது.
இந்நிலையில், உச்சநீதிமன்றத்தில் நடைபெற்று வரும் வழக்கில் (ஜான் கென்னடி அவர்களின் ஸ்பெஷல் லீவ் பெட்டிஷன்), தற்போது இடைக்கால உத்தரவு பிறப்பிக்கப்பட்டுள்ளது. இந்த உத்தரவு உள்காடுகளில் வசிக்கும் மக்களுக்கு மிகப்பெரிய பாதுகாப்பு மற்றும் நிவாரணமாக அமைந்துள்ளது.
இந்தச் சாதகமான சூழல் உருவாகிட, தேனி மாவட்ட ஆட்சியர் மேற்கொண்ட சீரிய முயற்சிகளே முக்கியக் காரணமாகும். மாவட்ட ஆட்சியர் மற்றும் அரசுத் தரப்பில் தாக்கல் செய்யப்பட்ட பிரமாணப் பத்திரம் (Affidavit) உச்சநீதிமன்றத்தில் உரிய முறையில் பரிசீலிக்கப்பட்டு இந்த உத்தரவு பெறப்பட்டுள்ளது.
இதற்காக மாவட்ட ஆட்சியர் மற்றும் அரசுத் தரப்பு அதிகாரிகள் கடந்த பல மணிநேரமாகத் தீவிரமாக உழைத்துள்ளதாகப் பொதுமக்கள் பாராட்டு தெரிவித்துள்ளனர்.
மக்கள் பிரதிநிதிகள் மற்றும் வன விவசாயிகள் பேட்டி
இதுகுறித்து பார்வர்ட் பிளாக் கட்சியைச் சேர்ந்த வழக்கறிஞர் சுரேந்திரன் கூறுகையில், “உச்சநீதிமன்றத்தில் தற்போது கிடைத்துள்ள இடைக்கால உத்தரவு உள்காட்டு மக்களுக்கும் மேகமலை மக்களுக்கும் மிகப்பெரிய நிம்மதியைத் தந்துள்ளது. இதற்கு முழுமுதற்காரணம் நம் மாவட்ட ஆட்சியரும், அரசு எடுத்த நடவடிக்கைகளும்தான்.
வரவிருக்கும் காலங்களிலும் தேவையான ஆவணங்களைச் சமர்ப்பித்து, நாம் அனைவரும் ஒன்றுபட்டுச் செயல்பட்டால் நிச்சயம் முழுமையான வெற்றி கிட்டும். இந்தச் சிறப்பான காரியத்தைச் செய்து கொடுத்த மாவட்ட ஆட்சியருக்கும், தமிழக அரசுக்கும் மக்கள் சார்பாக எங்கள் நெஞ்சார்ந்த நன்றியைத் தெரிவித்துக் கொள்கிறோம் என்றார்.
நீண்டகாலமாக வாழ்வாதாரப் போராட்டத்தில் ஈடுபட்டு வந்த வருசநாடு மற்றும் மேகமலை பகுதி மக்களுக்கு உச்சநீதிமன்ற தீர்வு புதிய நம்பிக்கையை ஏற்படுத்தியுள்ளதோடு, மாவட்ட நிர்வாகத்திற்குப் பொதுமக்கள் தங்களது நன்றியையும் மகிழ்ச்சியையும் தெரிவித்து வருவது குறிப்பிடத்தக்கது.
