விஷ்ணுபதி புண்ணிய கால சிறப்பு பூஜை
கார்த்திகை மாத முதல் நாளை முன்னிட்டு ஓசூர் பெருமாள் மலை திருக்கோயிலில் விஷ்ணுபதி புண்ணிய கால சிறப்பு பூஜை: “ஓம் நமோ நாராயணா” கோஷம் முழங்க 500-க்கும் மேற்பட்ட பக்தர்கள் சாமி தரிசனம்!

கார்த்திகை மாத பிறப்பு மற்றும் விஷ்ணுபதி புண்ணிய காலத்தை முன்னிட்டு, கிருஷ்ணகிரி மாவட்டம் ஓசூரில் உள்ள வரலாற்றுச் சிறப்புமிக்க பெருமாள் மலை ஸ்ரீ லட்சுமி வெங்கட்ரமண திருக்கோயிலில் சிறப்பு பூஜைகள் வெகு விமர்சையாக நடைபெற்றன. இதில் திரளான பக்தர்கள் கலந்துகொண்டு கொடிமரத்தை 27 முறை வலம் வந்து வழிபட்டனர்.
சூரியனின் நகர்வை அடிப்படையாகக் கொண்ட அயன மாற்றங்கள் மற்றும் விஷு புண்ணிய காலங்களில் வரும் நான்கு முக்கிய ஏகாதசி விரதங்கள் மகாவிஷ்ணுவிற்கு மிகவும் உகந்தவையாகக் கருதப்படுகின்றன.
அதன்படி, ஆடி மாதத்தில் வரும் சயன ஏகாதசி, கார்த்திகை மாதத்தில் வரும் உத்தான ஏகாதசி எனப்படும் பிரபோதினி ஏகாதசி, தை மாதத்தில் வரும் ஷட்திலா ஏகாதசி மற்றும் சித்திரை மாதத்தில் வரும் காமதா ஏகாதசி ஆகிய நான்கு தினங்களில் பெருமாளை வழிபடுவது அளவற்ற புண்ணியத்தைத் தரும் என்பது ஐதீகம்.
அந்த வகையில், இன்று கார்த்திகை மாதம் முதல் நாள் மற்றும் விஷ்ணுபதி புண்ணிய காலத்தை முன்னிட்டு, கிருஷ்ணகிரி மாவட்டம் ஓசூர் மாநகரில் அமைந்துள்ள நூற்றாண்டு பழமை வாய்ந்த, ‘பெருமாள் மலை’ என்று அழைக்கப்படும் மலை மீது வீற்றிருக்கும் ஸ்ரீதேவி பூதேவி சமேத ஸ்ரீ லட்சுமி வெங்கட்ரமண திருக்கோயிலில் விஷ்ணு கால பூஜை வெகு விமர்சையாக நடைபெற்றது.
முன்னதாக, மூலவர் பெருமாளுக்குப் பால், தயிர், தேன் உள்ளிட்ட பல்வேறு திரவியங்களால் சிறப்பு அபிஷேக ஆராதனைகள் நடைபெற்றன. அதனைத் தொடர்ந்து, பெருமாள் தாயாருடன் சிறப்பு அலங்காரத்தில் எழுந்தருளி பக்தர்களுக்கு அருள்பாலித்தார். பின்னர், திருக்கோயிலில் அமைந்துள்ள கொடிமரத்திற்குச் சிறப்பு பூஜைகள் செய்யப்பட்டன.

இதனைத் தொடர்ந்து, கோயிலுக்கு வந்திருந்த பக்தர்கள் “ஓம் நமோ நாராயணா” என்ற திருநாமத்தை உச்சரித்தபடியே, கொடிமரத்தை 27 முறை வலம் வந்து பயபக்தியுடன் வழிபட்டனர்.
அதிகாலை முதலே ஓசூர் மற்றும் அதன் சுற்றுவட்டாரப் பகுதிகளைச் சேர்ந்த 500-க்கும் மேற்பட்ட பக்தர்கள் நீண்ட வரிசையில் காத்திருந்து சாமி தரிசனம் செய்தனர்.
விஷ்ணுபதி புண்ணிய காலத்தில் செய்யப்படும் இந்த வழிபாட்டால் குடும்பத்தில் செல்வ வளம் பெருகி, நீண்டகால நிதிச்சுமைகள் மற்றும் கடன் தொல்லைகள் நீங்கும். திருமணம் கைகூடத் தாமதமாகும் இளைஞர்களுக்கு விரைவில் நல்ல வரன் அமையவும், தொழில் மற்றும் உத்தியோகத்தில் உள்ள தடைகள் நீங்கிப் புதிய முன்னேற்றம் கிடைக்கவும் இந்த பூஜை வழிவகுக்கிறது. சாதாரண ஏகாதசி விரதத்தை விடப் பல மடங்கு புண்ணியத்தைத் தரும் இந்த நாளில் வழிபடுவதால், முன்ஜென்ம பாவங்கள் விலகி, வாழ்க்கையின் கடினமான சூழல்களை எதிர்கொள்ளும் மனவலிமையும், இறுதியில் வைகுண்ட பதவி எனும் மோட்சமும் கிட்டும் என்பது பக்தர்களின் அதீத நம்பிக்கையாக உள்ளது.


