திருக்கார்த்திகை தீப திருவிழா திருக்குடைகள் காணிக்கை
திருவண்ணாமலை திருக்குடைகள் சமர்பண டிரஸ்ட் சார்பில் திருக்கார்த்திகை தீப திருவிழாவையொட்டி கைலாய வாத்தியங்கள் முழங்க 5 திருக்குடைகள் அண்ணாமலையார் கோவிலில் காணிக்கை செலுத்திய பக்தர்கள்…..
பஞ்சபூத ஸ்தலங்களில் அக்னி ஸ்தலமாகவும் நினைத்தாலே முக்தி அளிக்கும் திருத்தலமாக விளங்கும் திருவண்ணாமலை அண்ணாமலையார் கோவிலின் திருக்கார்த்திகை தீப திருவிழா உலக பிரசித்தி பெற்றது.
இந்த ஆண்டு திருக்கார்த்திகை தீப திருவிழா வரும் 15ம் தேதி கொடியேற்றத்துடன் தொடங்கி 24ம் தேதி அதிகாலை 4 மணிக்கு பரணி தீபமும், மாலை 6 மணிக்கு கோவிலின் பின்புறம் உள்ள 2668 அடி உயரம் கொண்ட மலை உச்சியில் மகா தீபம் ஏற்றப்பட உள்ளது.
இந்நிலையில் இன்று சென்னையை சேர்ந்த திருவண்ணாமலை திருக்குடைகள் சமர்பண டிரஸ்ட் சார்பில் மூன்றாவது ஆண்டாக அண்ணாமலையார் மாட வீதியில் உலா வரும் போது தேரின் பின்னால் கட்டப்படும் திருக்குடைகள் அண்ணாமலையார் கோவிலில் காணிக்கை வழங்கப்பட்டது.
24 அடி அகலத்தில் ஒரு குடை, 12 அடி அகலத்தில் இரண்டு குடைகள் மற்றும் 8 அடி உயரத்தில் இரண்டு குடைகள் என 5 திருக்குடைகள் அண்ணாமலையார் கோவிலில் காணிக்கையாக வழங்கப்பட்டது. கடந்த 9ம் தேதி திருவள்ளுவர் மாவட்டத்தில் இருந்து தொடங்கி சென்னை, செங்கல்பட்டு, காஞ்சிபுரம், வேலூர் வழியாக திருக்குடைகள் இன்று திருவண்ணாமலையை வந்தடைந்தது குறிப்பிடத்தக்கது.
