கஜேந்திர புஷ்கரணி படிக்கட்டுகளில் அமர்ந்து சாமி தரிசனம்
108 திவ்ய தேசங்களில் ஒன்றான காஞ்சிபுரம் புஷ்பவல்லி தாயார் சமேத அஷ்டபுஜ பெருமாள் கோவிலில் தல வரலாறு எடுத்து கூறும் கஜேந்திர மோட்சம் நிகழ்வு நடைபெற்றது.
திரளான பக்தர்கள் கஜேந்திர புஷ்கரணி படிக்கட்டுகளில் அமர்ந்து சாமி தரிசனம் செய்தனர்.
கோவில்களின் நகரம் என போற்றப்படும் காஞ்சிபுரம் மாநகரில் எட்டு கரங்களுடன் அஷ்டபுஜ ஆதிகேசவப் பெருமாள் கோவிலில் பெருமாள் வீற்றிருக்கிறார்.
திருமாலின் 108 திவ்ய தேசக் கோவில்களில் 44 வது திவ்ய தேச கோவிலாக போற்றப்படும் இந்த கோவிலில் மட்டும் தான் பெருமாள் எட்டு கரங்களுடன் மூலஸ்தானத்தில் காட்சி அளிப்பார்.
அதேபோல தொண்டை மண்டலத்தில் உள்ள வைணவ தலங்களில் இங்கு மட்டுமே பரமபத வாசல் உள்ளது.
இவ்வளவு பிரசித்து பெற்ற அஷ்ட புஜ ஆதி கேசவ பெருமாள் கோவிலில், கஜேந்திர மோட்சம் ஒவ்வொரு வருடமும் வெகு விமரிசையாக கொண்டாடப்படும்.
கஜேந்திரன் எனும் பெயர் கொண்ட யானை தினமும் குளத்தில் உள்ள தாமரைகளை பறித்து அஷ்டபுஜ பெருமாளுக்கு பூஜை செய்து வந்த போது, குளத்தில் இருந்த முதலை கஜேந்திரனின் காலை கவ்வியது. தன்னால் இயன்ற அளவு முதலையின் வாயிலிருந்து விடுபட முயன்ற யானை இறுதியில் ஒரு தாமரை மலரை தனது துதிக்கையால் கவ்வி வானை நோக்கி ஆதி மூலமே என தாமரை மலரை போட்டு பிரார்த்தனை செய்தது.
தனது பக்தனின் துயர் நீக்க அஷ்டபுஜ பெருமாள் கருட வாகனத்தில் எழுந்தருளி தனது சக்கராயுதத்தால் அந்த முதலையின் தலையை துண்டித்து, கஜேந்திரனை மீட்டு மோட்சம் அளித்ததாக வரலாறு கூறுகிறது.
இன்று ஆடி மாதம் அஸ்த நட்சத்திர நாளான இன்று கோவிலின் கஜேந்திர புஷ்கரணியில் திரளான பக்தர்கள் முன்னிலையில், கஜேந்திரனின் காலை பற்றிய முதலையை துண்டிக்கும் நிகழ்வு வானவேடிக்கையுடன் நடைபெற்றது.
இந்த கஜேந்திர புஷ்கரணி படிக்கட்டுகளில் திரளான பக்தர்கள் அமர்ந்து இந்த தெய்வீக காட்சியை கண்டு வணங்கினர். பின்னர் பெருமாளுக்கு தீப ஆராதனை காட்டப்பட்டு பெருமாள் கருட வாகனத்தில் எழுந்தருளி கோவிலுக்கு திரும்பினார்.
